Rydym i gyd yn hoffi gweld wyneb cyfeillgar wrth wneud ein siopa wythnosol, felly mae’n wych cael cigydd fel Peter Hill sy’n gweithio yn y siop, fel bod y math o wasanaeth y buasech yn ei ddisgwyl yn eich siop cigydd leol yn cael ei gynnig yn eich archfarchnad Morrisons leol.
Ac yntau â dros 40 mlynedd o brofiad — 20 ohonynt mewn siopau Morrisons — mae Peter yn sicr yn gwybod un neu ddau o bethau am gig. Ac fel y mae’n cyfaddef, mae hyd yn oed yn “edrych fel cigydd nodweddiadol”, gyda bochau cochion ac wyneb cyfeillgar.
Mae’n gweithio yn siop Morrisons yn Heckmondwike, Leeds. Mae’n gymeriad poblogaidd y tu ôl i gownter y cigydd, ac mae llawer o gwsmeriaid rheolaidd yn ei adnabod wrth ei enw.
Balchder Peter
Ac yntau wedi cychwyn ei yrfa mewn siop cigydd fechan pan nad oedd ond yn 14 mlwydd oed, mae Peter yn eithriadol o falch o’r ffaith ei fod yn gallu cynnig gwasanaeth o’r math y mae cwsmeriaid yn ei gael mewn siop fechan, ond am brisiau archfarchnad. “Pan fyddwch chi’n gweithio mewn siop, mae pobl yn hoff iawn o siarad efo chi,” meddai Peter. “Rwy’n cael llawer o gwsmeriaid yn gofyn fy nghyngor ar sut i goginio gwahanol fathau o ddarn cig, neu hyd yn oed yn stopio am sgwrs yn unig. Byddaf wrth fy modd yn rhannu awgrymiadau a chynghorion, ac mae’n wych pan gaf gwsmer rheolaidd yn taro heibio eto i ddweud ‘bod y stecen syrlwyn yna wedi bod yn hyfryd’.”
Nid yw cigyddion siop Morrisons yn cynnig cyngor yn unig — maent wedi cael yr hyfforddiant llawn sy’n eu galluogi i roi’r dewis ehangaf posibl i chi. O glwyd cig oen i’r stecen ffiled orau, y cwbl sydd arnoch ei wneud yw gofyn.
Eich dewis
“Ni yw’r unig archfarchnad lle mae cwsmeriaid yn gallu gofyn am yr union beth y mae arnyn nhw ei eisiau,” meddai Peter, “ac fe fydda’ i’n ei baratoi ar eu cyfer yn llawen, yn union fel y buasai’n digwydd yn eich siop gigydd draddodiadol.
“Felly, os yw cwsmer yn dymuno cael dim ond un golwyth i de, byddaf yn ei gael iddyn nhw — byddaf yn cael fy nghwsmeriaid oedrannus yn gofyn am hynny’n aml. Oes oes ganddyn nhw deulu mwy, ac yn dymuno cael rhywfaint mwy, fe wna’ i hynny’n arbennig hefyd. Mawr neu fach, does dim gwahaniaeth gen i.”
Mae Roy Craven, un o arbenigwyr Morrisons ar gig, yn ychwanegu: “Morrisons yw’r unig archfarchnad sy’n rhedeg ei gwaith cigydd yn union fel y buasai cigydd lleol yn ei wneud. Felly, fe ellid ein disgrifio fel eich cigydd teulu lleol.”
“Ym mhob cam o’r broses, o brynu ein holl gig ein hunain i’w dorri a’i baratoi ein hunain, rydym yn gweithio yn yr un ffordd yn union â chigydd traddodiadol, ond ar raddfa lawer mwy. Oherwydd hynny, rydym yn cynnal uniondeb ein cynnyrch. Rydym yn falch iawn ein bod wedi gallu dal gafael yn y gwerthoedd hyn.”
O’r cae i’r siop
Fel cwsmeriaid, rydym i gyd yn dymuno bwyta bwyd iachach a mwy ffres, ac mae gennym ddiddordeb cynyddol mewn gwybod yn union o ble mae’n dod.
Mae Roy Craven yn disgrifio’r broses sy’n gysylltiedig â chyrchu a phrynu cig gan ffermwyr y mae Morrisons yn eu hadnabod ac yn ymddiried ynddynt: “Rydym yn gwybod popeth am ein da byw ac o ble mae’n dod. Rydym yn siarad yn uniongyrchol â ffermwyr, rydym yn adnabod eu ffermydd, ac rydym yn adnabod yr amgylchedd a hyd yn oed y caeau y mae’r anifeiliaid wedi dod ohonynt.
“Nid yn unig hynny, ond mae gennym reolaeth lwyr dros y modd y mae’ch cig yn cyrraedd eich basged siopa. Mae hynny’n galonogol iawn i ni ac i’n cwsmeriaid. Mae dros 90 y cant o’r cig yr ydym yn ei dorri a’i baratoi yn y siop yn dod o’n tîm ein hunain o brynwyr da byw, sy’n chwilota’r DU gyfan am y cynnyrch gorau posibl. Rydym yn defnyddio’n lladd-dai ein hunain, ac yna mae cigyddion siop megis Peter yn torri ac yn paratoi ein cig bob dydd. Bydd y cig hyd yn oed yn cael ei becynnu yn y siop, fel bod gennym reolaeth lwyr bob cam o’r ffordd.
“Cymerwch gig oen ffres fel enghraifft. Mae ein prynwyr yn teithio ledled y wlad i gyrchu’r cynhyrchion o’r ansawdd gorau. Mae’r tymor ŵyna’n dechrau yn Nyfnaint a Chernyw’n gyntaf, felly byddant yn cychwyn yn yr ardal honno. Yna byddant yn mynd i fyny i dde a chanolbarth Cymru, wedyn i Ganolbarth Lloegr ac Ardal y Llynnoedd, ac o’r diwedd i’r Alban. Y rheswm am hyn yw bod y tymor ŵyna naturiol yn dilyn y tywydd, felly mae’n dechrau ychydig yn hwyrach wrth i chi fynd ymhellach tua’r gogledd.
“Natur sy’n penderfynu pa bryd mae tymor ŵyna’r gwanwyn yn dechrau. Ac mae’n dibynnu, mewn gwirionedd, ar ba bryd mae’r glaswellt newydd ir yn tyfu ym mhob ardal o’r wlad. Po gynhesaf yw’r tywydd, cynharaf yn y byd y mae’r tymor yn dechrau.”
Ffefrynnau cadarn
Mae’r math o gig y mae cwsmeriaid yn ei brynu’n dibynnu llawer iawn ar y tywydd. “Mae pobl yn tueddu i fynd am olwython mawr a chig stiwio yn y gaeaf,” meddai Peter. Yn yr haf, fodd bynnag, mae steciau syrlwyn a chynhyrchion barbeciw’n hynod boblogaidd, ac yn aml bydd Peter yn llenwi’r adran barbeciw dair neu bedair gwaith y dydd.
Mae yna bwyslais hefyd ar fwyta’n iach, ac mae yna amrywiaeth enfawr o ddewisiadau o gig llai brasterog sy’n llawn protein ac yn isel eu braster. Mae dewisiadau poblogaidd yr haf hwn yn cynnwys byrgyrs stêc wedi eu gwneud â chig llai brasterog, a chebabau ffiled porc ac afal pîn — ill dau’n berffaith ar gyfer y barbeciw.
Mae’r broses o gael cynhyrchion cig Morrisons i’ch bwrdd yn sicrhau hefyd eich bod yn cael y darnau cig lleiaf brasterog posibl. “Cymerwch gig eidion fel enghraifft,” meddai Roy. “Rydym yn tynnu’r rhan fwyaf o’r braster yn ystod y cam cyntaf, fel bod y cig eisoes wedi ei drimio’n dda pan aiff i mewn i’r siop. Ond bydd y cigyddion yn y siop hefyd yn trimio mwy o fraster oddi arno cyn iddo gael ei arddangos.”
Edrych tua’r dyfodol
Mae Peter o’r farn mai ei ddull ef o weithio’r yw’r ffordd ymlaen ar gyfer cwsmeriaid. “Rwy’n meddwl bod cwsmeriaid yn dymuno gwybod o ble mae eu cig yn dod, ac mae arnynt eisiau arbenigwr i ateb eu cwestiynau. Maen nhw hefyd yn dymuno gallu gofyn am yr union fathau o ddarn cig y mae arnynt eu heisiau, a’r gwasanaeth y mae arnynt ei eisiau.”
Os hoffech gael cyngor ar sut i goginio cig, neu os oes arnoch eisiau rhywbeth arbennig nad ydych yn gallu ei weld ar y cownter, gofynnwch i’n cigyddion siop a byddant yn hapus i helpu.
