Pa fath o gig sydd â’r lefel isaf o fraster ynddo?
Fel rheol, mae llai o fraster mewn cig gwyn nag mewn cig coch. Felly, bydd llai o fraster yn eich twrci Nadolig nag mewn ochr orau’r forddwyd wedi ei rhostio, dyweder. Ac mae lefel y braster mewn porc yn gymharol isel — er nad yw hynny’n wir am y grofen, fy hoff ddanteithfwyd brasterog. Mae gwahanol lefelau o fraster mewn gwahanol fathau o ddarn cig hefyd. Cig brest yw’r math lleiaf brasterog yn achos da pluog (ar ôl tynnu’r croen), ac mae ochr orau’r forddwyd, ystlys las, coes las neu syrlwyn yn llai brasterog nag asennau cig eidion. Peidiwch ag anghofio bod pobi, brwylio neu rostio cig yn defnyddio llai o fraster na ffrio.
Pa olwyth sy’n rhoi’r gwerth gorau o ran rhostio?
Fy newis i bob amser fydd ansawdd yn hytrach na maint. Mae’n deg dweud bod pob math o ddarn cig yn gampus pan gaiff ei goginio’n iawn. Gorau po leiaf y gwastraff, yn enwedig os ydych yn bwydo plant, sy’n gallu bod braidd yn anodd eu plesio ynglŷn â’u cig. Mae ochr orau’r forddwyd, wedi ei rhostio, yn rhoi gwerth rhagorol am arian, ac mae’n olwyth coch o safon sy’n hawdd ei baratoi mewn llawer o wahanol ffyrdd. Ond am y gwerth gorau un, rhowch gynnig ar goginio coes las wedi ei deisio a’i thrimio, drwy ei chaserolio’n araf. Mae dwsinau o ryseitiau ar gyfer coginio stiw amheuthun yn y dull hwn. Blasus!
Faint y dylwn ei neilltuo ar gyfer pob person wrth brynu golwyth?
Y peth cyntaf y mae angen i chi ei wneud yw gweithio allan faint o ddognau llawn y mae arnoch eu hangen. Os oes gennych blant dan 12 oed wrth y bwrdd, cyfrwch bob un fel hanner dogn. Ac os ydych yn gwybod bod bwytawyr mawr yn dod, cymerwch hynny i ystyriaeth hefyd. Fy synnwyr bawd i, wedyn, yw neilltuo tua 115–250 gram (4–8 owns) o gig amrwd ar gyfer pob person, yn achos cig oddi ar yr asgwrn, ac ychydig mwy — tua 170–340 gram (6–12 owns) — yn achos cig ar yr asgwrn. Os oes ansicrwydd, gofynnwch i ni, ac fe weithiwn ni’r cwbl allan i chi. Gallwn roi amseroedd coginio i chi hefyd ar gyfer eich golwyth.
See this page in English.